Lo director de l’Institut Nacional de las Lengas Indigènas de Mexic, Javier López Sánchez, a admés que 64 dels 364 dialèctes de las lengas autoctònas del país american son en naut risc “de desaparéisser”, segon çò qu’explica lo jornal Informador. Cadun d’aqueles dialèctes a mens de 100 parlants, qu’en fòrça cases vivon esparpalhats en divèrsas comunautats, e aquí los parents passan pas la lenga als enfants, çò ditz López Sánchez.
 
Un dels endreches ont lo procès es mai grèu es la Bassa Califòrnia, ont força lengas an ja desaparegut e d’autras son a desaparéisser. Es lo cas del kiliwa, qu’aviá un cinquantenat de parlantas al començament del sègle XXI.
 
Segon López Sánchez, en Mexic i a sèt milions de parlants de lengas autoctònas, dont un milion son monolingües dins la lor lenga.
 
Mexic a una diversitat lingüistica granda; al delà de l’espanhòl, lo govèrn reconeis 62 lengas indigènas coma lengas nacionalas. Segon lo darrièr cens oficial, 6% de la populacion mexicana parla una lenga indigèna, e la mitat d’aqueles parlan pas espanhòl. En Mexic se parla tanben d’autras lengas non autoctònas que portèron los immigrants europèus, coma l’anglés, e mai s’an pas cap de reconeissença oficiala.
 

 

 
 




Aqueste article ven del jornal catalan Nationalia.cat, amb qui Jornalet a un acòrdi de cooperacion.